Indicaziuns

Nos sciöche Scora de musiga todëscia y ladina un le compit prinzipal da sostigní les capazités musicales y da dé inant na gran varieté de savëi. I sun n zënter de competënza por la musiga y i ti dun impulsc ala vita culturala dl Südtirol. I ciarun dla tradiziun, i sun daverc a düc i orientamënc musicai y jun trus nüs.

I entusiasmun la jënt por la musiga y i pitun n insegnamënt integral y orienté al'esperiënza che condüj les scolares y i scolars a fá musiga instësc. I pitun na gran varieté de materies che tol ite la pedagogia musicala elementara, l'insegnamënt stromental y vocal, l'insegnamënt d'ensemble, le bal y teater musical, l'integraziun y la terapia musicala. I sostignun la sensibilité musicala sciöche ince la sensibilité artistica generala y i sun porchël un di pilastri portanc dla provinzia. I renforzun l'identité culturala. I dun consëis canche ara se trata de domandes sön la musiga y i promoiun la creativité a düc i liví de prestaziun.

Nosta oferta é por dötes les porsones che fej ion musiga, bel anfat tan de agn che ares á, olache ares vir o cara che süa posiziun soziala é. Al nes stá a cör les porsones che á n gran talënt mo sambëgn ince chëres che á bojëgns particolars. Nosc laur pedagogich é colié dassënn cun les scolines y les scores. I laurun deboriada cun i comuns y i ënc culturai, dantadöt cun les lies y assoziaziuns musicales. I se dun da fá por döta la sozieté te ocajiuns profanes y religioses.

I ghirun tröp da nos a livel artistich, i laurun cun competënza profescionala y cun la pedagogia plü atuala. I sun acompagnadësses y acompagnadus sensibli dles scolares y di scolars tl svilup musical y personal y i sotignun la scomenciadia autonoma. I s'orientun al program cheder y i adorun la lerch de realisaziun pedagogica por mioré les leziuns. I analisun criticamënter nosc laur y sciöche strotöra de formaziun se sotmetunse a n prozes d'evaluaziun permanënt.

Fá musiga é n meso de comunicaziun essenzial che é efiziënt ince canche nosc lingaz röia pro so limit. Tl zënter de nosc laur él, aladô de chësc, le lauré deboriada. Cosciënza dl dovëi y afidabilité, umanité y toleranza, sinzirité y onesté, ponsé positif y coraje da fá valch de nü é por nos valurs zentrai che s’acompagnëia.