Biblioteca online

La maiú pert dl material dla biblioteca dl Referat Musiga popolara ciafon ince tla banca dac de musiga popolara dl'Austria y dl Südtirol sön https://www.volksmusikdatenbank.at/PSI/init.psi.

LA BIBLIOTECA SPEZIALISTICA

Le Referat Musiga popolara á na biblioteca spezialistica cun leteratöra sön la cultura popolara dla musiga tl Südtirol y foradecá.

Te nosta biblioteca vëgnel sides porsones interessades, sides ciantarins, musicontri, sciöche ince inrescidus, esperc y studënc. Tla biblioteca él a desposiziun libri, revistes, notes y CDs. Le patrimone dla biblioteca vëgn tresfora amplié y ajorné.

L'ARCHIF

Tl archif dl Referat musiga popolara él documënc de gran valüta por la cultura musicala tl Südtirol:

- na documentaziun ampla por la tradiziun di cors de dlijia tl Südtirol

- materiai (registraziuns, protocoi y fotografies) de inrescides

- n patrimone leterar important sön la zitra incër le 1900

Le cör dla biblioteca é n tesur de musiga popolara particolar y plü avisa la racoiüda Quellmalz, che é gnüda realisada incër le 1940-42 tl Südtirol. Tratan l'opziun êl rové adalerch tl Südtirol le musicologh Dr. Alfred Quellmalz cun sü colaboradus a mené n'inrescida sön la musiga popolara sön inciaria dla Comisciun culturala dl Südtirol (sënta dl SS Ahnenerbes).

Le resultat é 3.000 registraziuns cun material d'acompagnamënt scrit y fotografies. Les registraziuns documentëia a na moda rapresentativa dötes les sorts musicales y dötes les formes dla trasmisciun a usc tl Südtirol.

Tl archif dl Referat Musiga popolara él les fotografies originales, le material scrit d'acompagnamënt (schedes personales, protocoi d'inrescida, transcriziuns, diari y i.i.) sön l'inrescida, sciöche ince les copies digitales de chëstes registraziuns importantes. I originai dles registraziuns é tl archif Hoerburger dl'université de Regensburg.

Les fotografies dla racoiüda Quellmalz é tl archif fotografich Quellmalz. Al é rodunt 1.500 fotografies, cun lassura dantadöt portraits di soldas y di stromënc musicai che ai â ciafé. La racoiüda de fotografies nes dá ince informaziuns sön olache ara é gnüda a se le dé. A chësta moda vëgnel documenté le guant da vigni de, les trohts, sciöche an viô y la contrada.

L'archif de fotografies de Quellmalz tol ite i originai y negatifs, sciöche ince na banca dac digitala cun fotografies cataloghisades che an pó chirí sön le computer aladô de cer criters.